قلبي معك لو شفت جسمي مع الناس

قلبي معك لو شفت جسمي مع الناس ** مـاغـاب طـيفك عن خـيالي دقيقـه
ودعـتك اللي ما خـلق مثلك اجناس ** حـيل الله اقوى لو دموعي غريقـه
والله ما ارخـصتك ولا طـعـت بلاس ** بـس النصـيب يصـيب هذي الحقيقـه
اظـلم سماي وحـال من دونك الياس ** وتحـشـرجت عـبرات قـلبي بـضيقـه
هـمي عـقب فـرقـاك ماهـو بينقاس ** وجـروح قـلبي يـا طـبيبه عميقـه
اجلس بوسط الناس واسرح بالهوجاس ** ما بـيـدي حـيلـه ولا لي طـريقـه
حـبك بوسـط القلب مبنـي على ساس ** عنك العزى يا روح روحي ما اطيقه